ఎవరూ చూడని ఒంటరి క్షణం, చిలిపి తలపులు కవ్విస్తే ...
ముంచుకొచ్చిన ప్రేమని మూటకట్టి
ముద్దుల రూపంలో దాచుకొనే "కిస్సు బ్యాంక్ లాకర్" లా ఉంటుంది
మనసు పాలకడలిలో మేధోమధనం సాగేవేళ...
తలపులతో బరువెక్కిన శిరో మంధరం
చింతల తాకిడికి కిందకి ఒరగకుండా
ఊతంగా నిలిచే కూర్మరాజంలా ఉంటుంది
నడిఝాము నిద్దరలో ఏ పీడకలో నను వణికిస్తే...
ఉలికిపడ్డ మనసుని వెన్నుతట్టి జోకొట్టి
భయాన్ని చెరిపే నాన్నారి చిరునవ్వులా ఉంటుంది
ఆశల సౌధం పేకమేడలా కూలిన క్షణం...
విసవిసా పరుగెత్తుకొచ్చి మంచమ్మీద కూలబడితే
కన్నీరు పీల్చుకొనే నా దిండు...అక్కున జేర్చుకోనే అమ్మ ఒడిలా ఉంటుంది
- నందు